Nuver Spul
Pionnen op in wankel boerd
of hynders yn de stringen?
Lopers op in rjochte koers
en tuorren om te nimmen?
It is in spul fan pendanten:
partoeren dy’t swart wyt
klokjend tidigje op de wyn
sûnder ytlike sekondanten.
Dames dûnsje op ’e râne,
klampend oan harren rol
kinne se hiel wat ferneare.
Keningen falle en ferdwine,
mar sûnder mat en klop
kriget inkeld ien alle eare!
